吳克儉外訪頻 議員﹕不如做旅遊專員

【明報專訊】教育局長吳克儉出任局長期間多次公幹外訪，上個財政年度外訪17次，用咗近70萬元。噚日立法會財委會審核財政預算案特別會議，有唔少非建制派議員狙擊佢，其中公民黨郭家麒建議佢落任後去申請做旅遊事務專員。


郭家麒話，「如果局長做好教育政策，好似你去旅行咁專心的話，我相信香港教育制度會好啲，你下一個位可能要全世界地方你都可以喺你任內去完，肯定會有好多貢獻畀我哋旅遊業。」香港本土毛孟靜問吳局長，佢所由外訪係咪經時任政務司長林鄭月娥批准，吳克儉回應話：「我所有外訪係經當時嘅司長批核嘅。」


民主黨許智峯就問佢，去完外訪返嚟，對港教育有咩貢獻。吳克儉話，佢外訪期間每日都寫電郵返香港，講參加咗咩活動、討論咗咩事，例如佢最近去泰國就即時簽咗一帶一路獎學金嘅協議。


吳局長又話，近年有好多新政策推出嚟，包括免費幼稚園教育、職專教育等，都需要國際網絡同標竿研究結果。佢又舉例，自己去新加坡參與未來大學教育全球交流會，同新加坡教育部長會面，全面檢視大學教育，亦會藉外訪了解點樣加強學生交流活動、院校科研等。