林鄭赴港台　工會遞信自比「老爺車行公路」

【明報專訊】啱啱當選下屆特首嘅林鄭月娥，噚日去咗港台接受訪問，佢喺競選期間曾經批評過港台電視「唔掂」，引起港台員工不滿，雖然之後解釋嗰番言論只係「少少講笑」，但係港台節目製作人員工會都趁林太嚟到港台，向佢遞交公開信。


信入面提到，林太當選嗰日話要「懷住謙卑嘅心情，與大家開始另一階段嘅同行」，工會相信「同行」嘅先決條件係「了解」，並且設身處地。


稱資源少 望設身處地

工會話林太次次去港台都「行色匆匆」，所以可能好難想像港台員工係「開老爺車，行廿一世紀傳媒高速公路」嘅情况，工會重申港台資源緊絀，硬件未能與時並進，如果要維持多元嘅廣播服務，就要有賴決策局攞出披荊斬棘嘅管治意志，仲要做到「不含糊、不卸責」，先能「議而有決，決而有行」，亦希望林太從速同港台管理層見面，落實新大樓嘅建設。