快閃落區4個鐘行勻全港 林鄭忙裏偷閒恤個髮

【明報專訊】候任特首林鄭月娥當選後第一日行程超緊密，朝早一連拜會特首梁振英、署理終審法院首席法官鄧國楨同立法會主席梁君彥，下晝快閃落區，4個鐘內行勻港九新界。
與CY見記者後冇答問題
林太朝早拜會前上司梁振英（CY）約半個鐘後一齊見記者，在場逾50個中外記者都關心兩任特首嘅交接問題，但佢哋各自以中英文發言約5分鐘後就轉身走，無回應提問，有記者追問5年前問過梁振英嘅同一條問題：「係咪當選後就唔答記者問題？」但兩人已經絕塵而去。
Emily以為林太行程緊密，所以唔能夠同CY一齊回應記者，原來林太先返咗去候任特首辦45分鐘，之後到終院同署任首席法官嘅常任法官鄧國楨會面。
候任特首辦新聞秘書庾志偉同Emily解釋，話因為要尊重現任特首，所以唔答問題，要去到立法會先一次過回應。
全日快閃之旅完咗之後，Emily以為林太會直接返候任特首辦，點知佢部座駕就車咗林太去位於灣仔軒尼斯道嘅一間樓上理髮店，林太就話上去洗個頭，唔知夜晚係咪有重要人物要見呢？林太出嚟嗰陣，見佢髮型分別唔大，但較為蓬鬆，明顯有光澤。Emily望過呢間理髮舖嘅價錢，如果只係吹頭收費120蚊，但整埋造型就盛惠300至500蚊。