譚耀宗瞓唔着 成排頭位選委

【明報專訊】雖然噚日特首選舉投票時間為早上9時至11時，但Emily發現，選委兼民建聯前主席譚耀宗朝早7點幾已經到達會展，成為「排頭位」嘅選委，與候選人握手。
昨日唔少公眾人士及記者一早去會展排隊等進入會場，估唔到選委都咁早到，譚耀宗同Emily解釋，因為噚晚「瞓唔着」，所以朝早7點幾就到咗場。被問及係因為緊張結果還是興奮，佢話兩樣都有。
吳光正「深入敵營」
至於一向力撐林鄭月娥嘅九龍倉集團首席顧問吳光正，亦喺點票期間坐足全程等開票。不過佢就「深入敵營」，坐咗喺一班民主派選委中間，仲同身邊嘅單仲偕有講有笑。單仲偕其後同Emily講，當時對方經過搵位時，咁啱邀請佢坐低傾吓偈，講吓香港撕裂嘅問題。單仲偕話吳光正仲趁機游說自己，讚林太夠公正，唔會偏幫任何大地產商。