選舉辯論「採訪」變睇電視直播

【明報專訊】由7間電子傳媒籌辦嘅《2017行政長官選舉辯論》噚晚8點喺將軍澳電視城舉行，3名特首候選人曾俊華、林鄭月娥、胡國興都有出席，Emily去到現場，被安排喺一間房，同其他記者一齊睇電視直播「採訪」。
Emily同攝影同事預先報名到場觀賞辯論，但辯論開始後唔能夠進入會場，大會安排咗房畀記者睇直播，而喺開始前半個鐘，就畀記者入去錄影廠拍攝3名候選人賽前硬照同短片，為時10分鐘。10分鐘咁珍貴，Emily把握時間留意3人互動，都唔夠時間問吓被分成4組嘅觀眾嘅睇法；而候選人嘅競選團隊就坐喺錄影廠後面，大會用黑布將佢哋同觀眾席分隔開。
Emily又知道，獲抽中出席論壇嘅觀眾被安排喺港鐵站上車直達錄影廠，離開都係同樣安排，所以記者想問吓觀眾對候選人嘅評價都無機會。有別於上次教協論壇，今次傳媒搞嘅論壇，反而無安排行內俗稱嘅「咪兜」畀候選人接受訪問，反而圍起記者於一個位置，記者只可以影相「遠眺」候選人離開。