職員外套無九巴logo 林辦特登PS走

【明報專訊】網民真係好鬼細心，話說特首候選人林鄭月娥（左二）喺三八婦女節當日，喺fb上載多張相片，係佢與唔同行業嘅婦女合照，其中一張係同3個九巴女職員，但有網民留言就話，點睇果幾個職員嘅外套無logo嘅？佢哋係咪真係九巴職員？

Emily問過九巴，佢哋話無嘢可以回答，好彩林辦果邊拆解咗原因，話說特首候選人如果要刊登支持者嘅相片，都要對方簽署支持同意書，相片裏面嘅人都做咗呢一步，但同意書係處理個人問題，為咗唔想令人有九巴係咪支持林鄭嘅感覺，林辦好小心咁用PS抹走咗外套原有九巴嘅logo。其他特首候選人仲有曾俊華同胡國興。