長毛教護髮﹕唔好吹 免暴曬 用髮尾油

【明報專訊】自由黨榮譽主席田北俊（田少）主持嘅商台節目《田式生活》，噚日請來社民連立法會議員梁國雄（長毛）做嘉賓，田少同長毛除咗講政治同社運，仲講到長毛嗰把長頭髮。長毛喺節目度除咗讚自己把頭髮「好靚」，仲同大家分享護髮心得。
年過60嘅長毛，因為一把又長又濃密嘅「秀髮」而有呢個稱呼，長毛話自細已經覺得「嬉皮士（Hippie）」好有型，所以就開始留長頭髮，而田少講講吓又讚長毛將把頭髮保養得幾好，「你呢個年紀頭髮幾健康，如果唔係甩晒㗎喇」。
日日洗頭 保持清潔要緊
長毛於是就趁機講吓護髮心得，包括「唔好暴曬啲頭髮」、「永遠唔好（用風筒）吹頭。搵兩條大毛巾，一抹就乾七八成，再吹一吹佢，用自然風都得」，又話「洗頭嗰陣唔好落太多嘢，洗乾淨就算喇，最多落啲髮尾油，潤一潤佢得㗎喇」。但係佢話最近因為憂愁多，所以「白咗啲」。
仲有呀，長毛把頭髮咁長，原來佢好堅持要日日洗頭，佢重話「保持清潔先，其他有無型唔緊要」。