f b拍露宿者容貌被批 小麗稱有問准街友

【明報專訊】日前通州街天橋底大火，令到好多露宿者失去家當。立法會議員劉小麗前晚去咗現場視察，仲即場訪問受影響嘅露宿者，又呼籲市民捐出物資畀受影響嘅露宿者。不過，小麗就畀網民批評無常識，隨便上載露宿者嘅容貌。小麗強調，已經問准咗受影響街友接受訪問。


探訪受火災影響街友

小麗前晚去咗通州街探訪受火災影響嘅露宿者，即場做facebook live，向網民講解現場情况。當時小麗訪問咗兩名街友，話佢哋因為火災而急需乾糧、輪椅同日用品等，因此即場呼籲市民，如有物資，可以捐畀街友，「水、杯麵、乾糧想是不會嫌多」。


小麗提到，現場有好重嘅燒焦味，又話受影響嘅街友據說有6、7人。小麗話自己都買咗一啲乾糧，同畀咗一啲現金街友應急。


籲市民捐物資幫助

小麗喺facebook live期間，影咗兩名街友嘅面貌，隨即惹來一啲本土派同網民批評，鬧小麗隨便上載露宿者嘅樣。小麗後來就喺facebook強調，已經問准有關街友接受訪問。