有話說﹕西九露營 共享親子好時光

【明報專訊】睇埋睇埋呢個月嘅新聞，發覺香港嘅小朋友都幾唔開心，壓力來自學業之外，仲有同屋企人嘅關係。大人就話每日朝九晚六返工，放工總算可以唞番陣，但係細路除咗朝七晚四返學，又要做功課，又要溫書，仲要學嘢同補習，唯一放鬆嘅機會就係瞓覺同玩，各位父母真係要諗下，你有冇畀足夠時間同仔女享受一個真正嘅假期？


設施齊備 有專人教紮營

Mama幾時都話，假期係留嚟休息嘅。呢個周末，如果你諗唔到同仔女做乜，不如放低書本，唔使去好遠，近近哋去西九文化區苗圃公園已經有好多嘢玩！今個月嘅「自由約」活動喺3月11、12號舉行，屆時各個團體有音樂、戲劇表演，仲有好多有趣工作坊、苗圃公園樹木導賞、手作市集等等，活動真係多到數唔晒，的確係一家大細走出市區嘅戶外好節目！


講到專為小朋友而設嘅，就一定要數由西九自由約合作伙伴ohmykids主辦嘅孩子市集，由小朋友做檔主向大家sell各種獨特產品。而今次大會另有一項特別主題，就係「不完美．營」，當日已報名嘅十個家庭，會喺西九來一次城市camping。ohmykids聯合創辦人魯凱凌（Helen）話，香港好多城市人都未試過露營，帶住小朋友的話難度更高，所以比較難踏出第一步。「喺西九做城市露營對佢哋嚟講係方便嘅，因為有自來水，有洗手間，仲有一大片草地兼欣賞到美麗嘅景色。我哋當日會派有經驗嘅同事教佢哋紮營，其實個營紮得穩唔穩並唔係重點，而係家長可以同小朋友一齊經歷呢件事。」


Helen話好多小朋友生活富足，好多嘢都覺得係必然嘅，但係去到冇熱水、冇高牀暖枕嘅地方，一切還原基本步，又係另一番體驗。佢仲話今次有七十幾個家庭報名，證明成件事對家長嚟講係有需求，即使今次唔能夠參加，都可以自己計劃一次親子露營，重新建立大家嘅親子關係。