薯片1萬襟章派街坊 派「大字」落區

【明報專訊】特首候選人曾俊華自參選以嚟大打民意戰，佢噚日就喺競選辦所在嘅合和中心地下，介紹佢用嚟宣傳參選理念嘅3組大字模型，分別係「希望」、「團結」同「信任」，每組模型有2米高、1.8米闊，未來3星期會喺唔同地點展示。佢又準備咗4款襟章派畀市民，襟章印有呢3個詞語同競選辦標誌（圖一），據知競選辦預備咗1萬個襟章「派街坊」。
曾俊華話，除咗希望「講」理念，亦希望市民「睇」得到，所以就製作大字模型，「聽到、見到，一定要做到」，希望當選後憑住呢3個理念，令香港變得更好。
曾俊華facebook專頁噚日就公開邀請社區組織、學校、餐廳同商店等，話如果有合適場地，又想展出大字模型，就可以聯絡競選辦，成功安排後會有「神秘送貨員」將模型親自送到，但就無透露「送貨員」係咪就係曾俊華本人。