湯家驊斥不尊重選舉精神 曾俊華：會去代表性高的論壇

【明報專訊】隨住3名特首候選人正式入閘，唔同政團同組織都有意搞選舉論壇，其中民主思路後日（5日）會舉行論壇，林鄭月娥同胡國興答應出席，但曾俊華就拒絕。民主思路召集人湯家驊（Ronny）噚日喺港台節目繼續咬住曾俊華唔放，話如果唔係支持者舉辦嘅論壇就唔去，並非忠於選舉精神。


曾俊華噚日出席活動後解釋，自己已經收到幾十個選舉論壇邀請，要視乎時間同代表性，決定係咪出席，自己會參與「代表性高」嘅論壇。


其實，3個候選人都係有選擇咁參加不同團體嘅論壇，唔係得曾俊華唔畀面。Ronny話，候選人應該尊重選舉嘅公開性同公平性，強調如果林太拒絕出席下星期三嘅資訊科技界論壇，自己都會批評同失望。


講番民主思路場論壇，Ronny話佢自己、傳媒人謝志峰同學者趙永佳會組成提問小組，稍後會揀出一定數量嘅問題，喺論壇上抽籤問候選人，而由於有候選人缺席，可能會增設台下選委發問環節。