ID號碼錯 胡官1提名暫被DQ

【明報專訊】特首候選人胡國興前日攜同180張提名票報名參選，不過其中一張屬於社福界黃旭熙嘅提名票，被選舉主任裁定無效DQ咗，但胡官入閘資格無受影響。


對於呢次「甩轆」，胡官噚日透過競選辦解釋，話因為打印資料時身分證號碼出錯所致，黃旭熙噚日重簽提名表交番畀選舉事務處，即係截至昨晚，胡官嘅有效提名票暫為179票。


黃旭熙同Emily講，事緣佢早前出席「民主300+」選委商討日，主辦單位幫選委喺提名表上印上身分證號碼，但自己簽名時無為意錯漏。黃旭熙話噚日已經簽番張正確嘅提名表。


胡官亦透露，由於有另一個選委最近更改咗身分證上嘅姓名，所以胡官按選舉主任建議，同時遞交咗嗰位選委用新舊名各交嘅一份表格，編號係99A和99B，然後由選舉主任選擇合適嘅一張，實際提名數目並無重複。