馬會同樂日 VR尋找梵高

【明報專訊】想唔想見到舒米高？又想唔想「遇見」梵高？香港賽馬會年度大型同樂日就可以滿足兩個願望！因為曼聯一代門將舒米高到時真係會到現場，至於梵高呢，大家可以喺活動中透過虛擬實境（VR）遊戲欣賞佢嘅畫作。


今個復活節期間（4月14日至16日），沙田馬場同彭福公園將會舉辦香港賽馬會年度社區盛事「同心同步同樂日」，賽馬會希望透過活動令參加者感受點樣寓教育於娛樂，到時會提供70多項益智活動同遊戲畀市民玩。


當中最吸引嘅係可以同一代「鋼門」舒米高切磋球技，另外會場設有虛擬實境遊戲，其中一個叫「尋找梵高」嘅環節，等大家可以置身荷蘭藝術大師梵高嘅藝術世界。同時市民亦可一如以往喺活動中與馬近距離接觸。有興趣市民可以喺3月6日（下周一）上晝10點開始登入Ticketflap電子售票網購買門票，票價每套60元，每人最多可買5套，每名持票者可帶同一名3歲或以下小童免費入場。