有話說﹕孩子現輕生念頭 多聽少說教

【明報專訊】農曆新年過後，接二連三發生多宗學童輕生事件，實在令人心痛。學童為乜自尋短見，原因好複雜，Mama唔係專家，唔敢亂估；只係好想知道，萬一仔女透露有輕生念頭，家長究竟可以點樣回應？


Mama請教過香港撒瑪利亞防止自殺會自殺危機處理中心主任何永雄。佢話大部分有意輕生嘅人，事前都有迹可尋，問題係身邊人有無察覺到。當學童講明有咁嘅念頭，家長首先唔好企圖淡化佢嘅想法，講埋一堆唔恰當嘅說話，例如「唔好諗埋一邊啦」、「咪胡思亂想」、「唔准亂噏」等等；又或者自以為好清楚仔女性格，認為佢只係「敢講唔敢做」，輕視後果。


另一種極端就係家長過分緊張，不斷用大堆道理企圖游說仔女﹕「你已經好幸福，為乜想死」、「你有冇諗過我呀」、「大把人慘過你啦」。何永雄話，以上兩種都係「拒絕」當事人感受嘅做法，根本無嘗試了解佢痛苦所在。


不明白孩子的痛苦

其實，想到自尋短見，當事人一定係好痛苦，痛苦到一個超越佢所能承受嘅地步，又覺得身邊無人明白佢。試問家長連仔女為乜痛苦都唔知道，咁又點幫佢呢？所以，最理想做法就係合埋口，畀佢講！聆聽期間亦唔需要急於拋出解決方案，何永雄話，好多時縱然客觀事實未改變，只要當事人講咗出嚟，覺得有人明白佢，痛苦感已經即時減少。


不過，萬一當事人未準備好要講出來，家長就唯有拍拍佢膊頭、攬下佢，總之用你嘅方法表達出你對佢嘅關心，畀佢知道你好愛佢。若然家長真係唔知點做，可以打去香港撒瑪利亞防止自殺會自殺危機處理中心熱線，會有專業人士指導你相關技巧。電話﹕2389 2222。