青政前成員辦免費頻道 入餐廳裝電視機

【明報專訊】已退黨嘅青年新政前發言人周世傑（Donald）踏足商界，創立免費電視頻道打入餐廳小店，以「再次電視汁撈飯」為開台口號。佢嘅公司會喺食店裝電視機，食客光顧時變相一定要睇佢哋嘅電視節目同廣告。
稱投資者打本千萬
呢個免費電視頻道叫LifeTV（拉闊電視），透過Ｗi-Fi同雲端技術廣播。創辦人Donald話，有兩個美國工程公司嘅投資者，「打本」1000萬元支持佢創業。Donald又指LifeTV會免費向餐廳提供電視，播放佢哋嘅節目同廣告，包括旅遊、動畫等節目，亦有本地當紅YouTuber「熊仔頭」嘅片段，家已有350間合作餐廳，Donald希望年底可覆蓋2000間食肆，包括連鎖店。
梁游眾籌 「冇特別做乜」幫手
一年前退出咗青政，Donald家望番轉頭，就覺得青政嘅處事方式已經同佢想像中有啲落差，但就唔評論港獨立場。另外，兩個被DQ嘅立法會前議員梁頌恆同游蕙禎發起眾籌作上訴，Donald對前黨友嘅做法「冇反對」，亦「冇特別做啲乜」去幫手。