樂視拖欠廿幾萬被追數

【明報專訊】樂視可謂股壇奇葩，明明財困同壞消息接踵而至，都闊佬懶理，仲要先後得到融創（1918）同信利國際（0732）「科水」入股，但間公司似乎多多錢都唔夠填數，家轉個頭又被廣告公司公開追數！如果唔計人哋公司入稟嘅成本，其實今次索償金額都只係僅僅廿幾萬港紙，樂視堂堂一間大公司，咁少錢都拖數，好似講唔通啵！

本地廣告公司Easy Group噚日就入稟向樂視體育追數22.81萬。狀紙上面寫，樂視體育喺去年7月同Easy Group簽訂合約，由Easy Group提供兩架附有活動室嘅廣告車作為宣傳用途，費用約22.81萬元；其後Easy Group多次向樂視追數，仲出過律師信，樂視竟然覆一句「喺12月前都還唔到」；都算，之後仲要無晒聲氣，逼人哋法庭見。老老實實，樂視與其再搞咩超級電動車，不如乖乖哋還咗錢先啦。


[小琴密語]