擅餵馬騮去年檢控72宗

【明報專訊】猴年啱啱過咗去，一眾馬騮依舊繼續喺郊野地區佔山為王。漁農界立法會議員何俊賢早前就提出，馬騮襲擊遊人同埋闖入民居情况似乎愈來愈多，質疑當局措施成效不足。環境局長黃錦星噚日書面回覆立法會，話漁護署過去3年無收過馬騮襲擊市民嘅個案，上年就有447宗猴子滋擾，但已經比前年減少近百宗。


咁點解馬騮成日喺民居附近出沒？漁護署調查發現，馬騮係習慣咗畀人餵或者畀垃圾站嘅食物吸引，提醒市民應該停止餵佢哋同妥善清理垃圾。


其實法例一早列明禁止市民喺金山郊野公園等棲息地餵馬騮，最高仲可以判罰1萬元。不過，Emily見過唔少市民忍唔住手，漁護署上年巡邏咗禁餵地點1031次，最終提出咗72宗檢控，暫時有45宗係成功檢控。