CY讚婦女「撐起半邊天」

【明報專訊】四大特首參選人男女各佔一半，究竟下屆特首係男係女？特首梁振英（CY）噚日出席婦女事務委員會研討會無就選舉表態，但話今時今日嘅香港，婦女已「撐起半邊天」，喺社會各方面擔當重要角色。
CY發言時話，認同政府要帶頭推動婦女發展，2015年嘅《施政報告》就要求所有政策局同部門將委任女性加入政府諮詢及法定組織嘅成員比例，由30%增至35%。佢話婦女家已「撐起半邊天」，香港婦女既係家庭支柱，亦係重要人力資源，喺社會其他方面擔當重要角色，政府正積極為婦女提供唔同支援，例如增加幼兒照顧服務名額、實施家庭友善嘅僱傭政策等。
政總地下唔反光 張建宗：見微知著
新任政務司長張建宗就話，女性佔香港人口52%，原本今屆政務司長係問責團隊中唯一女性，但最近出現變化，令特區班子變成全男班，話呢個情况唔太健康，希望下屆政府團隊有更多女性，可以有思維碰撞咁話。張建宗又提到政府亦有照顧女性，舉例指政府總部嘅地板唔反光，係尊重女性衣著需要，話政府係見微知著喎。
另外，CY噚日發表網誌，話本屆政府任期餘下4個半月，佢同全體同事仍然努力工作。佢話噚日出席6場公開活動為各界人士打氣，由婦女、勞工、商界到香港第一家華資銀行嘅活動都有。