民記促供養父母免稅額可攤分

【明報專訊】新任財政司長陳茂波聽日就會發表財政預算案，多個政黨先後表達訴求，希望爭取財爺接納佢哋嘅意見。民建聯家庭事務委員會噚日與傳媒茶敘，講吓對有關家庭政策嘅期望，好似希望政府加強支援情緒受困擾嘅學生，如增加駐校社工、加強關懷熱線等，為學生提供即時危機介入及深入輔導。
民建聯立法會議員柯創盛話，曾經收到求助，有兄弟為分配供養父母免稅額出現爭拗，希望政府准許兄弟姊妹攤分供養父母等嘅免稅額，加強家庭和諧；而為減輕中產負擔，民建聯建議設立子女教育開支扣稅額及外傭開支扣稅額等。
經民聯冀60歲可兩蚊搭車
經民聯噚日亦喺facebook上載兩條短片，搵咗兩個社區幹事講訴求，包括希望兩蚊乘車優惠可以擴至60歲及以上長者（現時65歲及以上可享優惠）；以及期望政府援助舊樓業主同住戶，改善樓宇安全問題。