汕大划艇隊抵港 誠哥迎接 憶兒時避難千里路

【明報專訊】長和系主席李嘉誠創辦嘅汕頭大學，20個學生分兩隊划艇隊，由上周六（11日）起，從廣東省汕頭市出發，經陸豐、汕尾同深圳等地，一連8日划咗640公里，最後喺噚日划到香港完成創舉，李嘉誠親自喺終點黃埔海濱迎接，並同學生擁抱慶祝。每個划艇隊員都經過嚴格選拔，由260個參加者中挑選出嚟，通過為期一年嘅訓練先參與活動。
划艇手訓練一年
88歲嘅李嘉誠噚日以名下基金會主席身分主持活動，佢致辭時提到兒時逃難經歷，話11歲由潮汕來港，其間路途曲折，由於要避開日軍，要先向北走才可以南下，走咗1000公里路先到岸邊。佢話當年未見過汪洋、未經歷過風浪，亦唔知可唔可以喺茫茫大海中到達彼岸。
派一克純金心經金片
另外，基金會公關喺李嘉誠離開活動之後，向出席者派發一張「摩訶般若波羅蜜多心經」做紀念品。呢張唔係普通心經，而係由1克純金印製並已過膠嘅薄金片，尺寸大約係一張商業卡片大小，過埋膠比一張A4紙厚少少。基金會公關話，金片以市值計大約值300元，喺日本特製，但強調經文內容比起金片價值更有意思咁話。