任總講QE2 記者踴躍報名

【明報專訊】「任總」任志剛退下金管局總裁後，號召力不減。香港記者協會邀請佢向記者演講，題目係美國第二輪量化寬鬆（QE2）帶嚟嘅問題，反應不俗。記協噚日發電郵畀會員後，不消片刻，即有15行家報名。

記協搞咗個財經工作坊畀記者，10場演講，位位都係星級講者，包括港交所（0388）行政總裁李小加、證監會行政總裁韋奕禮、證監會執法部董事施衛民、香港中資證券業協會主席謝湧海、金管局外事部主管尹子輝、金管局貨幣管理部主管黎巧兒等，加埋會計師公會、景順投資管理嘅代表，場場爆滿。任總呢一場，聽講係特別加開，所以行家都好驚喜，希望聽吓任總點睇QE2。

呢場演講喺12月13日舉行，小琴都好想八畀大家知，任總有咩獨特嘅睇法。不過，演講係閉門進行，唔准報道。之但係，各位讀者唔使憂愁，若任總有乜好料，小琴必定會既不違反君子協定，一定喺閉門演講之後，追訪任總，讓各讀者慢慢分享。