林鄭競選辦聲明：「一國兩制」情信 丈夫親撰

【明報專訊】特首參選人林鄭月娥星期二情人節喺facebook上載老公林兆波寫嘅情信，信中提到原本唔贊成林鄭參選係基於「自私」，但最終私心軟化，變成鼓勵、支持，信中又話「期望妳能成功當選並在新崗位上為香港市民努力工作，為落實一國兩制作出貢獻」，令唔少網民質疑，點解情信會寫一國兩制？林鄭競選辦公室噚日就嚴正聲明，呢封信完全出自林兆波手筆。


林兆波嘅情信引起網民熱烈討論，Emily星期三偶遇林兆波，問到佢封信係咪佢親手寫，佢停頓幾秒後回應話「我簽得名，梗係我寫啦」。但《信報》噚日就有專欄提到，據了解封信係出自競選辦成員嘅手筆。


林鄭競選辦噚日就發聲明，唔點名講有報道話封信係由其他人草擬，競選辦「嚴正聲明絕無其事，有關信件完全出自林先生手筆」，又話對呢類純粹猜測或惡意中傷而不向當事人求證嘅報道表示遺憾。