稱七警「情有可原」 何君堯盼輕判

【明報專訊】七警案之前判咗罪成，唔少建制派議員都公開幫七警求情。何君堯噚日同傳媒茶叙講起，話對判決感到難過，形容七警「情有可原」，因為佢哋唔係貪贓枉法，係想對示威者小懲大誡，但喺承受巨大精神肉體壓力下，執法時的確過咗火位，佢希望七警「有熱誠嘅人生」，唔會因為呢件事被摧毁，而法官判刑時可以輕判咁話。梁美芬、周浩鼎等亦話尊重法庭判決，但希望從輕發落。


認與中聯辦傾特首選舉

講到特首選舉，何君堯對中聯辦曾經聯絡自己傾選舉直認不諱，佢話可能自己早就表態支持林鄭月娥，所以嗰次電話都唔係傾得好長，「詳細（內容）講畀你聽，驚你出唔到門口」。林太任發展局長時處理丁屋僭建態度強硬，但鄉事背景嘅何君堯就話，政治無永遠嘅敵人，自己會向林鄭反映政策意見。


有報道話特首梁振英下個月可能做全國政協副主席，對於香港特首身兼國家領導人係咪有損一國兩制，何君堯就認為若梁振英如果身兼兩職，係「more than okay」，話大家思維唔應該故步自封，一嚟香港屬於中國，二嚟香港特首做到國家領導人，即係香港影響力可以直達中南海喎。