國際特赦開書店 喚關注言論自由 撕走書頁 體會審查

【明報專訊】國際特赦組織香港分會噚日起一連兩日，喺中環開辦「書店」，有成千本兒童書、雜誌同小說等唔同類型嘅書任君選擇，每本一律27蚊，但睇睇下就會吊住讀者嘅癮。


原來每本書都有啲書某頁數被撕爛，有啲頁數用膠紙封住，有啲就用箱頭筆刪晒文字同公仔，總之就令讀者無辦法知道本書全部內容，令讀者體會「審查」感覺。香港分會總幹事區美寶話，收到呢千本書原本都係完好，刻意「特別加工」，希望大家體驗言論同出版自由被侵蝕，被審查嘅可以係任何書，所有讀者都可以受影響。


書店每本書賣27蚊，係呼應《基本法》第27條有關保障香港人享有言論、新聞同出版自由嘅條文，Emily亦留意到，書店入面展品列出第27條嘅條文，但當中有字句消失咗，隱約見到銅鑼灣書店店長林榮基個樣（圖），希望大家關注挑戰香港自由嘅事件。「書店」位於中環砵典乍街36號樂慶里，今日會由朝早10點營業到夜晚7點，有興趣嘅巿民可以趁最後一日去參觀。