大學生選特首 32%個個都唔揀

【明報專訊】特首選舉3月26日舉行，絕大部分市民無份投票，但都可以透過民調表達吓意願。中大學生刊物《大學線》就喺1月中旬以問卷形式，問到八大院校共323名同學仔嘅意見，問佢哋想選邊個做特首，結果32%嘅人話個個都唔揀，而31%受訪者話會揀曾俊華，其次係曾鈺成，而胡國興、林鄭月娥、梁國雄及葉劉淑儀，喺學生民調中得票率全部個位數（見表）。


31％選曾俊華

受訪學生對「雙曾」嘅評分亦較其他潛在候選人高，以1分為最負面、10分為最正面，曾俊華嘅平均分係6.19，曾鈺成就有6.08分。葉太以2.99分排最尾，林太就有3.91分排尾二。受訪者中，有48%人話最唔希望葉太做特首，其次係林太（22%）。


至於下屆政府應該首要處理邊3個問題？61%話解決房屋問題，近半受訪者希望政府能消弭社會撕裂，認為政府應解決中港矛盾和貧窮問題各有逾三成。問卷亦問到下屆特首最須具備乜嘢條件，結果顯示，「能維護港人利益」和「能捍衛法治、人權、言論自由」均為最重要條件，各有近七成受訪學生選擇。