張建宗自認「波牛」 後生時愛睇愛踢

【明報專訊】唔少人都知政務司長張建宗係工作狂，除咗返工之外，噚日佢喺網誌透露咗另一興趣，原來佢係「波牛」。張建宗話，佢年輕時成日睇球賽，亦會落場比賽，但近年工作比較忙，少有捧場機會，所以一有機會就會支持足球賽事，好似大年初四就去咗大球場，出席賀歲盃決賽嘅開球禮和頒獎禮，為傑志足球隊打氣。


張建宗噚日喺網誌以「從體育精神到優質生活」為題撰文，全文長達2400字，佢自稱波牛，話香港人鍾意運動，本屆政府喺地區大量增加體育基建，為市民提供唔同類型嘅康體設施，推廣普及體育；又話政府加強培訓精英運動員，等佢哋喺大型國際體育賽事中盡展潛能，政府又會喺新發展區建設「單車友善」環境等。


張建宗話，可能大家都留意到，佢呢幾個星期都特意透過網誌呢個平台，以較長篇幅介紹今年《施政報告》內佢統籌嘅主要新政策措施，佢話希望透過網誌為公眾提供多一個資訊渠道，加強與市民溝通。唔知司長又會唔會考慮開facebook同市民互動交流呢？