高永文自爆 兩打玫瑰情人節贈妻

【明報專訊】下星期二就係情人節，食物及衛生局長高永文噚日出席醫管局新春團拜，透露情人節當日要出席壽宴，冇得同老婆二人世界。佢講笑話，收到邀請嗰陣有啲驚畀老婆鬧，好彩老婆好大方，應承同佢夫妻檔出席。咁有無打算送番份大禮畀老婆補數先？佢就話買花梗係要偷偷哋買啦，又忍唔住自爆，會喺相熟花店訂兩打紅玫瑰。嘩，講咗出嚟咪無驚喜囉，唔通仲有神秘禮物？


梁栢賢否認升官

至於同場嘅醫管局行政總裁梁栢賢，前晚突然喺facebook話自己由衛生防護中心到醫管局已做咗10年，未來日子更具挑戰，希望大家繼續支持，網民即刻留言問佢係咪步步高陞。佢同Emily講，只係感嘆時間過得快啫，無特首參選人邀請過佢加入未來管治班子，佢亦覺得自己唔啱做局長，現階段最想做好交接工作，咁先可以放心退休。佢同醫管局仲有兩年約滿，暫時無意續任。