指會議中多次驅逐離場無議員受傷 梁君彥欣慰議會「好過南非」

【明報專訊】立法會主席梁君彥上任初期，立法會會議都有啲混亂，但佢話近月會議運作暢順，佢感到好欣慰，仲拎南非議會保安員同反對派議員打大交嚟做對比，話香港議會水平同標準好高，「起碼我哋好過南非」。梁主席話，立法會將員工同議員安全放喺首位，咁多次趕議員離場，慶幸無議員受傷。
梁君彥噚日同傳媒新春茶敘，有人問佢，如果新民黨葉劉淑儀選唔到特首，返嚟同佢爭立法會主席做會點算，梁主席大笑話，「呢個好呀，咁我唔使咁辛苦，可以返去湊孫。」佢話自己做主席辛苦咗，私人空間都少咗，但話早排同家人去日本旅行，都遇到有港人認到佢，仲幫佢揸相機影相，都幾開心。
指4特首參選人都好好 長毛好乖
對於下一屆特首期望，佢話希望新特首重視行政立法關係，但就保持中立，唔評論支持邊個參選人或提名，但會投票。佢仲話4個參選人，包括胡國興、葉劉淑儀、林鄭月娥或曾俊華，以及想出選嘅長毛梁國雄都好好喎，都有良好合作關係，「長毛都好好，好乖、幾好㗎，以工作關係嚟計」。
講到佢同泛民關係，梁主席話農曆年啱啱過，都計劃約各黨派傾下偈。對於佢主持會議同埋趕人出場惹爭議，佢就話自己角色應該係「球證」，只係想球賽順利，「無理由球員同球證打交，或者球員打球證架」。