葉劉約見紀律部隊爭支持 林鄭上年曾邀官邸聚會

【明報專訊】特首參選人近日都各出其謀爭取曝光，Emily聽講，其中一名參選人葉劉淑儀聽日（周四）會去尖沙嘴一間消防局，見紀律部隊總工會代表，聽下唔同紀律部隊中人嘅意見。聽講唔止葉太，林鄭月娥方面近期都有搵人聯絡過紀總爭取佢哋支持。


紀總成員組織來自5個紀律部隊，入境、消防、懲教、海關及飛行服務隊。至於警隊，Emily所知警察員方組織內部已有清晰定案，唔會參與任何特首選舉嘅事，唔會約見同提供意見等，避免捲入選舉漩渦。


雖然紀律部隊中人都「無票」，但自從佔領運動以來，政府都愈來愈着重爭取紀律部隊支持，舊年10月，仍然係政務司長嘅林太原來曾經約過政府人員、紀律人員評議同會員方組織代表，去佢官邸茶敘，輕鬆交流意見。


Emily聽紀律部隊中人講起，政務司長邀請代表去官邸聚會已停頓多年，當時對林太嘅邀請都好歡迎，當然無諗過當時仍然話唔選特首嘅林太最終出戰啦。