fb撐曾俊華粉絲專頁 強調自發 抄足「We撐林鄭」設計

【明報專訊】今屆特首選舉主戰場之一係網上平台，除咗各參選人喺facebook開設嘅正牌專頁，仲湧現咗唔少千奇百怪嘅專頁。


例如早前就有不知名團體設立咗「We撐林鄭」專頁，支持林太做特首。專頁強調係自發，唔係官方組織，無接觸過林鄭同對方競選辦。


曾競選辦：與專頁無關

事隔幾日，有人就照辦煮碗搞咗一個叫「We撐鬍鬚」嘅專頁。唔單止設計、標誌抄足，連簡介都一式一樣，只不過將林鄭月娥換成鬍鬚，唔認真睇真係分唔出兩個專頁嘅分別。專頁亦發揮鬍鬚「抽水」本色，不時向林鄭月娥同葉劉淑儀挑機。


曾俊華選舉辦發言人之後回覆話，有關專頁同競選辦完全無關。因為專頁可能涉及潛在選舉開支，曾俊華競選辦就「溫馨提示」專頁負責人要了解同遵從相關嘅選舉法例，以免違法。