冇份投票擲吓骰仔 工黨推特首跑馬仔棋

【明報專訊】特首選戰各參選人基本上已亮相，日日都有唔少關於跑馬仔嘅新聞，市民無票投，工黨就趁年宵推出「特首跑馬仔棋」（圖），話等市民親歷吓呢場小圈子選舉。遊戲係工黨自家構思同香港製作，6隻棋上面印咗參選人嘅卡通公仔，包括胡國興、葉劉淑儀、林鄭月娥、曾俊華，仲有曾經話考慮參選嘅曾鈺成，最後一隻就係「問號人」，為大家留番多啲幻想空間。


遊戲玩法主要係擲骰仔、行棋同抽牌，最快兜一個圈到終點就勝出。遊戲牌顯示唔同情况，其中有隻牌就寫住「愛港愛國」，上面有個大交叉，抽中就需要罰停一個回合，背後意思係「被人屈：被其他參選人同阿爺講你唔『愛國愛港』，令你選情受屈」，唔知有咩影射呢？


工黨話希望用香港近年發生嘅政治事件同現時嘅選舉機制為背景，等玩家親歷小圈子下嘅選舉遊戲，集趣味同通識教育於一身。除咗「特首跑馬仔棋」，工黨仲會推出喺維園年宵推出其他產品。