CY重提派6000元﹕未攞 被揭曾承諾捐畀慈善基金

【明報專訊】特首梁振英（CY）噚日發表任內最後一份《施政報告》，佢喺記者會上被追問全民退休落空問題，CY就話自己競選時一直都係講退休保障，當時已經表明唔支持全民退保。佢又主動提到，當年政府全民派6000蚊，佢「今日都仲未羅，仲喺庫房」，不過呢個說法就畀人質疑佢講大話喇。
被認為暗批曾俊華
CY話，佢既理念係要為有需要既人提供支援，「個餅就咁大，所有人都食，有需要嘅人就少咗」。CY重提當年派錢，佢個6000元「仲係庫房」，話唔認為應該分薄有需要人士既資源。
大家應該仲記得，2011年時，係當時既財政司長曾俊華係財政預算案度提出，向月入少於1萬元市民既強積金戶口注資6000蚊，結果受到批評，最終改為向全港18歲以上市民每人派6000蚊。CY呢刻主動提起呢6000蚊，就被認為係批評薯片叔叔。
不過，當時擔任行會召集人嘅CY，原來曾經講過會捐口左6000蚊，《文匯報》就曾報道，CY係公開活動表明會將6000蚊捐畀「寸心行動」基金，協助受沙漠化影響既內地人，又呼籲中小學生捐出部分利市錢。究竟CY當年有無拎6000蚊，以及有無捐畀該基金，Emily問過特首辦，至截稿前未有回覆。