議員參觀體院 搵運動員集郵

【明報專訊】立法會民政事務委員會議員噚日浩浩蕩蕩咁去參觀香港體育學院，仲同精英運動員一齊食晏交流，同場仲有民政事務局長劉江華，議員見到一眾體育明星都表現興奮，有人仲話忍唔住要影相「集郵」。勞工界立法會議員陸頌雄事後喺自己個facebook上載佢試玩健身嘅相，睇落去真係出盡晒力，好投入咁。
民建聯劉國勳就話大開眼界，話見識到環境模擬室，可以控制溫度、濕度、氣壓，模擬精確嘅訓練環境，供運動員使用。體院嘅朋友同佢哋介紹運動科學，好似桌球，都係有晒數據分析。今次參觀活動嘅議員仲包括委員會主席馬逢國、謝偉俊、梁國雄、陳志全、容海恩、羅冠聰，同埋唔係委員會成員既潘兆平和蔣麗芸。