公民黨年宵推「出閘紅綠燈」

【明報專訊】農曆新年年宵市場即將開鑼，唔少政黨都把握呢個機會到維園擺檔籌款，公民黨今年就食住特首跑馬仔呢條水，力推「神奇出閘紅綠燈」 ，仲附送一套代表唔同潛在特首選舉參選人嘅貼紙，黨魁楊岳橋話係寓意大家都有得「公民點燈」。


附送「參選人」貼紙 自行「點燈」

將喺維園花市開檔嘅公民黨，於雞年想食住特首選舉呢個勢，佢哋噚日嘅年宵產品記者會，就臨時撞正林鄭月娥宣布參選特首嘅大會，搞到好多記者去唔到。一開場楊岳橋就搞笑咁話：「好肯定好多（記者）都去咗會展，而嚟得嘅記者就鍾意公民黨多啲。」


公民黨除咗一如以往，有執委余若薇坐鎮為市民寫揮春，又會賣余若薇設計嘅山水畫膠file，一套5個賣100元，另外仲有自家設計嘅購物袋同tee。而今年嘅重點推介就係「神奇出閘紅綠燈」，每個68元，此乃一個紅綠燈形嘅裝飾坐枱燈，仲附送一套印有代表不同潛在特首參選人嘅貼紙，包括「奶媽」、「葡萄」等，等大家自行「點紅點綠」，又可以「反欽點」，將個綠燈送畀自己嘅心水人選。楊岳橋話呢盞燈寓意「公民點燈」，希望將來真係有得一人一票揀特首。