鄺俊宇郭榮鏗手語發言 睇得明冇？

【明報專訊】立法會大會噚日辯論街工梁耀忠提出嘅爭取手語成為香港官方語言動議，唔少立法會議員即場「指手劃腳」，試下用手語發言。唔知民主黨鄺俊宇係咪平時跳舞跳得多，手語動作都特別誇張。佢喺發言嗰陣話，手語需要更多推廣，身體殘障唔應該局限夢想，更用手語打出「爭取手語成為官方語言」嘅手勢。公民黨郭榮鏗就喺發言一開場連續打咗3次手勢，不過主席同在場議員都唔明佢講乜。郭榮鏗之後解釋，係用手語提出規程問題，話若果有聾健人士選咗入立法會做代議士，係咪能夠充分履行《基本法》賦予職能。
不過立法會最後喺分組點票下，否決咗呢個動議。勞福局長張建宗總結時話，本港現時仲未演化出一套通用手語，現階段應該將推廣基礎手語當做首要工作，令容易學習嘅手語同常用詞彙普及化。