葉國謙重返立會 受記者歡迎

【明報專訊】民建聯前立法會議員葉國謙重返立法會！阿謙噚日因為去立法會開黨團會議，所以順便去議事廳外同記者打招呼。阿謙最近都被影到分別去曾俊華同林鄭月娥嘅司長官邸，分別同二人見面。阿謙噚日同記者傾閒偈時，就笑言「官邸好難入咩」？話只要有獲邀請，官邸個個（人）都可以去。


阿謙繼續被追問同曾俊華及林鄭月娥見面內容，佢都係嗰句「無可奉告」。目前坊間有唔少特首跑馬仔嘅傳聞，早前就有指民建聯唔提名特首候選人，阿謙講起呢單傳聞就有啲勞氣，講明係「流料」，又反問點可以唔提名人呢？


阿謙難得返去立法會議事廳外，當然吸引好多記者去同佢傾偈，連經民聯立法會議員林健鋒都特登去同阿謙打招呼，仲笑住話要向阿謙繼續學習。