講起故宮 梁卓偉為醫學博物館感觸

【明報專訊】政務司長林鄭月娥公布要喺西九興建香港故宮文化博物館，仲得到賽馬會慈善信託基金慷慨捐贈35億元興建新場地，港大醫學院院長梁卓偉噚日喺報章專欄就忍唔住感觸，話醫學博物館只能夠臨時租借場館，「勉力為繼」。


梁卓偉認為愛國同愛港並無衝突，有機會長期展出故宮珍藏係好事，但滿懷愛國自豪感去興建新博物館之餘，都可以同時增值既有嘅博物館，促進本土文化發展，唔單止唔會破壞西九文化區嘅鴻圖偉略，反而可互相輝映。


佢舉例，香港醫學歷史係本土歷史一部分，1894年爆發鼠疫，全靠當時仍是寂寂無聞、遠道而來嘅法國細菌學家耶爾森發現病原，其後命名為鼠疫耶爾森氏桿菌，係世界醫學史嘅重大突破；醫學博物館立有一尊耶爾森銅像，紀念佢嘅貢獻。梁卓偉話，醫學博物館嘅價值超越醫學領域，記載港人經歷過嘅創傷和戰勝疾病經驗。