查UGL事件 黃國健：CY唔玩 仲有人有興趣？

【明報專訊】立法會調查特首梁振英（CY）UGL事件嘅專責委員會籌備小組噚日開會，其間要討論委員會嘅未來委員人數。工聯會黃國健喺會上話，委員會人數都無乜科學根據，加上「今時今日CY都話唔玩（不角逐連任），仲有咩人對佢有興趣」，不如將籌備小組嘅11人過渡去委員會就算。呢番言論引來泛民議員熱議，但經舉手表決後，委員人數最終都維持喺11個。


黃國健嘅言論引來一輪熱議，連籌備小組主席謝偉俊都反問：「咁不如唔使做啦大家？」但佢都補充話「相信（CY連任與否）唔係要做委員會嘅原因」。民主黨林卓廷就話，今次委員會係要檢討特首嘅操守，維護公義制度同廉潔文化，同CY連唔連任都無關係。


小組唔查「相關事宜」

另外，立法會秘書處原草擬嘅職權範圍，列明要調查特首上任後收取UGL協議有關嘅400萬英鎊嘅相關事宜；但唔少建制派議員擔心「相關事宜」一字，會令討論變得沒完沒了，最後決定刪除「相關事宜」字眼。籌備小組又決定，委員會個名叫「調查梁振英先生與澳洲企業UGL Limited所訂協議的事宜專責委員會」，預期喺下周五（13日）將報告呈上內會，再喺本月20日開會選出正、副主席。