華叔去世6年 教協支聯戰友追思

【明報專訊】創立教協、支聯會嘅司徒華（華叔）離開咗大家6年，一眾後輩依然好有心，噚日係華叔忌日，佢哋去柴灣歌連臣角紀念花園舉行追思會，由華叔戰友朱耀明牧師主持儀式，一齊唱詩讀經。


噚日有幾十人出席活動，教協仲租咗架旅遊巴接載參加者。現場所見，參加者有教協嘅馮偉華、葉建源、張文光；支聯會有何俊仁、蔡耀昌，民主黨就有尹兆堅等後輩。葉建源話，噚日風和日麗，佢哋喺朱牧帶領下唱詩歌《奇異恩典》，並逐一向華叔獻花。佢哋仲製作咗刊物，封面係幾隻海鷗飛翔，寫住「在那裡陽光常普照 在那裡沒有淚水」。