有話說﹕「知乎者也」不可怕？

【明報專訊】2017年嚟到，Mama祝各位新年快樂！開心還開心，放完長假，小朋友要收拾心情返學喇。學習本來係件愉快事，但如果課文內容困難，又冇好方法促進吸收嘅話，小朋友同家長都會叫苦連天。其中Mama不時聽到家長呻，話囝囡升高小、初中後要讀文言文，偏偏家長都未明白啲「知乎者也」點解，想教都無從入手。


最近有補習社貼咗紙喺玻璃門，寫住「你能聽懂普通話，就能學好文言文」，一班家長都想知係咪真，於是Mama即刻請教香港教育大學中國語言學系主任施仲謀教授。但施教授對「普通話學文言文」嘅講法覺得奇怪，佢話粵語歷史悠久，適合用嚟學文言文，相反普通話時期較近，可以用嚟學散文、新詩。


用普通話呢個方法行唔通，咁點先學得好文言文呢？施教授同團隊進行緊「論語與現代社會」實驗計劃，研發咗一套教材，喺17間中學試用，透過《論語》讓學生接觸文言文。選用《論語》係因為內容全部係對話，比較淺白，例如「溫故知新」、「有朋自遠方來」，雖則係文言文，但唔難解釋，內容又同立身處世有關，有助培養品德。


讀《論語》拍片 同孔子做朋友

Mama睇過套教材，發現內容都好得意，探討一啲從未諗過嘅話題﹕孔子鍾唔鍾意賺錢、孔子點識朋友、孔子點學音樂等等。施教授話想透過生活化內容，增加文言文嘅吸引力，「坐低死讀爛背，對學文言文唔太有效。不如先引起興趣，與學生嘅生活拉上關連，佢哋就知道文言文唔係高不可攀」。


除咗教材之外，施教授團隊仲搞過唔少活動，例如微電影創作比賽，鼓勵學生拍攝自己學《論語》嘅過程；又用電子通訊軟體進行朗誦比賽，學生將朗讀《論語》嘅錄音傳出，就有人評分，「雖然教緊古老嘅中國文化，但用先進科技去呈現，令學生覺得昔日文字同現代係相通」。


實驗計劃大約4個月後先完結，學生已經好有進步喇，「學生冇咁怕文言文，仲有人主動借《論語》」。雖然今次實驗計劃只包括中學，但施教授綜合咗校方、家長、學生嘅意見後，會調整教材同編輯成書，送去中小學同公共圖書館，到時中小學家長都可以借閱，幫囝囡學好文言文啦。