真•丁滿現身動植物公園

【明報專訊】大家對迪士尼動畫《獅子王》都唔陌生㗎啦，戲入面嘅角色「丁滿」同「彭彭」更加深受觀眾喜愛。香港動植物公園近日就安排咗「丁滿」原型動物「狐獴」坐鎮公園，有興趣嘅朋友不妨去睇吓。


愛食蟲挖地洞

新加盟動植物公園嘅兩隻「丁滿囡」，分別4歲同5歲，住喺公園為佢哋而設嘅「狐獴之家」。佢哋一般生活喺乾旱空曠嘅平原；身體修長，有銀棕色軟毛，尾巴末端深色，鍾意群居。佢哋亦係肉食動物，以昆蟲做主要食糧；爪強而有力，適合挖掘地洞。


同伴搵食時企高睇水

除咗咁，佢哋仲係相當合作嘅族群，當部分成員出去搵食嗰陣，其他成員就會留守洞穴做「哨兵」，以防鷹、鵰等猛禽襲擊。放哨嘅時候，佢哋會後腳站立，一旦發生危險，「哨兵」就會尖叫，提醒同伴入地洞或者搵掩護。


公園仲話，如果大家睇完狐獴覺得未夠喉，可以沿園內新設嘅雀鳥剪影指示牌，行到去附近嘅香港公園，到尤德觀鳥園觀鳥，或者喺霍士傑溫室欣賞植物。