言論得罪會計界選委 葉劉發聲明﹕無貶低之意

【明報專訊】宣布參選特首嘅葉劉淑儀，之前喺電台訪問講到會計界有「非精英人士」、「非建制人士」當選選委，言論惹起民主派會計界選委反彈，話葉劉得罪人。事隔幾日葉劉競選辦出聲明，話對有會計界選委對佢嘅言論感到冒犯，葉太澄清並無貶低任何界別或選委之意。


喺會計界攞到21席嘅民主進步會計師日前發聲明，唔滿意葉劉嘅言論，仲想約葉劉噚日見面。不過葉劉無應承赴約，透過競選辦噚日發聲明話，據了解大多數會計界當選選委屬非執業會計師。聲明又話，葉太見到選委投票結果顯示，好多年輕新晉專業人士可能擊敗傳統、資深前輩而當選，反映社會對建制不滿，有求變之意，仲話呢個同世界反建制浪潮脗合。競選辦話葉太會聆聽新一代訴求同聲音，願同各界溝通，爭取唔同界別嘅支持。


葉劉無就言論致歉，而會計界立法會議員梁繼昌就話，葉劉嘅聲明明顯係想為自己嘅言論「補鑊」。梁繼昌話，今次非建制選委的確並非執業會計師，但都係具行業資歷同專業。佢又話點解無四大會計師行嘅執業會計師代表非建制陣營出選，原因係四大行嘅員工好難去代表泛民團隊出嚟挑戰自己公司嘅老闆，所以要喺四大以外搵合資格嘅人參選。梁繼昌話葉劉日前質疑選委專業資格嘅言論係「謬誤」。