黃碧雲錢志庸監警會嘈交

【明報專訊】做咗監警會委員6年嘅民主黨黃碧雲，月底就會期滿卸任，佢噚日出席監警會同警方嘅聯席會議時，繼續佢踴躍發問嘅作風，結果臨尾一次開會，都同平時唔多出聲嘅「幫港出聲」律師錢志庸鬧交。


警方噚日喺會上介紹由警司義務組成嘅「奮進行動」計劃，呢個計劃本身係幫弱勢家貧嘅青少年，透過運動培養佢哋成為有責任感同思想積極嘅成年人。黃碧雲聽完就話唔明點解要喺監警會度傾呢啲同處理投訴無關嘅事項，警方諗住回應時，錢志庸已經插口話：「黃碧雲唔想傾，咪唔好傾囉！」Emily聽完都聞到火藥味。


警方就話個計劃可增進交流、減少誤會，有預防投訴嘅效果，黃碧雲反問個計劃本身都做咗20年，但近年反而見到多咗教育程度高嘅年輕人對警察有怨氣，仲要教育程度愈高就愈不滿，問警方喺呢方面有咩做到。


呢個時候主席郭琳廣唔等警察回應主動幫腔，話警方以前都講過可以點預防投訴。黃碧雲要求主席畀警方回應，但到警方預備開咪時錢志庸又插嘴，黃碧雲於是向主席表達不滿，錢志庸就照發言，話警方做嘅事係應該鼓勵，唔應該嘈落去，叫黃碧雲「唔好阻我哋時間」。黃碧雲唔服氣，回敬一句「你咁趕你咪走囉」。


主席就趁佢哋來往嘈咗幾次後即刻叫警方答問題，口水戰及時平息。其餘8名將離開監警會嘅成員包括梁繼昌、葉成慶、葉振都、劉玉娟、黃幸怡、黃德蘭、馬學嘉同任景信。