梁粉搞感謝CY集會 友好協進會籲出席 陳永棋﹕要休息

【明報專訊】特首梁振英（CY）唔連任，有人歡喜，有人愁，不過，仲有一班鐵桿「梁粉」不離不棄。參加過立法會選舉嘅香港政研會，聽日下晝會喺政府總部外面舉辦「送上祝福 說聲感謝——祝福CY集會」，表達佢哋嘅不捨之情。


負責組織活動嘅鄧先生話，網上反應空前踴躍，預計到時有超過100人出席。雖然政研會話無搵其他團體，不過Emily就聽到，連雲集一班全國政協嘅香港友好協進會，噚日內部都有幫政研會出信，呼籲會員出席。不過友好協進會永遠榮譽會長陳永棋就話，自己唔會去喇，要放假休息。


特製撐CY主題曲

鄧先生話，今次主辦活動係希望顯示佢哋撐CY係發自內心，仲批評CY一啲舊有支持者，自從佢宣布唔連任後，已經將焦點轉移到未來接班人，令CY剩低既任期失去部分輿論支持，「世態炎涼」。佢又認為CY既然無連任考慮，更應隨心所欲、大刀闊斧反港獨，為未來接班政府打好強勢管治基礎。


活動除咗會有大合唱，主辦方仲特別製作咗一首撐CY嘅主題曲，認真好有心囉。