垃圾桶原來由懲署炮製 仲有Q版

【明報專訊】下個禮拜就係聖誕節，Emily開始收到唔少政府官員嘅電子聖誕卡，而懲教署嘅電子卡特別有意思，除咗例牌嘅聖誕老人同聖誕樹動畫外，重點係卡裏面有條短片，介紹佢哋院所在囚人士製作聖誕紀念品嘅過程，包括薑餅人公仔、聖誕花掛飾等。其實，懲教署唔同院所有唔同嘅工場，用嚟訓練囚友唔同嘅職業技能，有布藝訓練、整餅等餐飲訓練，而Emily收到嘅電子卡，就係赤柱監獄圖像工場製作嘅。呢啲訓練係畀囚友他朝重獲自由後，可以多一項技能重投社會。


除收卡外，懲教署長邱子昭仲送咗啲製成品畀Emily，包括曲奇餅、朱古力，而最得意嘅就係一個Q版垃圾桶。


唔講唔知，家喺街上嘅食環署橙色垃圾桶，原來係懲教署製作㗎，Emily早前應懲教署長邀請參觀喜靈洲嘅懲教院所時，就見到囚友整緊垃圾桶。