無畀尹兆堅拋窒 劉國勳國旗早預備

【明報專訊】熱血公民鄭松泰喺10月立法會大會期間，因為倒插建制派議員枱面上嘅國旗同區旗，遭謝偉俊動議譴責。噚日立法會大會討論有關議題時，民主黨議員尹兆堅質疑，建制派上次擺喺枱面嘅國旗去咗邊，係咪已經被遺棄。阿尹一講完，民建聯立法會議員劉國勳就即刻拎住幾十支小型國旗入會議廳（圖），證明有好好保存。


唔少網民曾經瘋傳愛國愛港陣營喺多次大型活動後，有參加者將國旗同區旗隨手丟喺街上同垃圾桶嘅相片。尹兆堅噚日喺會上都質疑建制派議員，指佢哋口講對國旗珍而重之，「家啲國旗放咗喺邊？」點知無幾耐，劉國勳就拎住幾十支小國旗笑笑口行入會議廳，其黨友周浩鼎就立即反駁尹兆堅，證明佢哋對國旗珍而重之。