【明報專訊】又到聖誕，又到聖誕！12月就快過咗一半，周圍都充滿節日裝飾同消費氣氛。不過大家除咗諗住同小朋友開party、約埋朋友仔交換禮物大事慶祝之外，有冇諗過做下善事呢？要教曉小朋友施比受更有福呢個道理，有咩好過由佢哋身體力行？
記得2012年Happy Pama率先報道註冊慈善機構「BB醫生」成立，至今已經四年，近年佢哋積極邀請6個月大至6歲嘅小朋友擔任義工，安排佢哋親子探訪長者，呢班小義工只有一個任務，就係用佢哋天真無邪嘅笑容、表演同對話，公公婆婆開心。
由上年開始，BB醫生更加舉辦自創Tee義賣活動，透過公開義賣將溫暖送畀長者。今年佢哋招募咗200個3至6歲小朋友擔任小畫家及T恤設計，T恤上印咗呢200個小設計師嘅畫作，喺網上平台公開義賣，揀啱款式的話，你可以選擇將買到嘅T恤用嚟送禮或自用，甚至係贊助BB醫生喺Boxing Day由小朋友將呢件Tee親手送畀老友記。義賣善款將會用作BB醫生營運及發展，部分收益將撥捐BB醫生作慈善用途。
Mama覺得呢個活動真係好有意義，因為我哋成日都以為小朋友年紀仲細，即使搵到機會畀佢哋嘗試去幫人，都只覺得係一啲小恩小惠；若講到做義工，對佢哋嚟講可能有啲難度。但係正如BB醫生嘅創辦人李冠翹（Kiu）話﹕「我哋想將小朋友嘅力量帶到社會，同時希望小朋友透過做義工，感受到自己也有能力去幫助別人。」無錯，我哋真係唔好睇小孩子嘅能力呀！
雖然「童真創意Tee義賣」今日（13日）晚上11:59就截止，如果大家錯過咗，仲可以參加拆禮物日（12月26日）嘅「聖誕親手送長者及Free Hugs」活動，屆時喺尖沙嘴碼頭五支旗杆位置，同各位小設計師一齊親手將T恤及溫暖嘅擁抱（Free Hugs）送畀長者。阿Kiu話當日預咗90個家庭名額，分六個時段畀6個月大至6歲小朋友參加，如果想同小朋友過一個咁有意義又特別嘅聖誕，就要把握機會報名啦！
BB醫生「攬攬」改變世界
報名及詳情﹕goo.gl/forms/5wQRXGDFprdOFFBR2
新聞類別
副刊
詳情#
留言 (0)
