赴聖保羅晚宴遲到 曾鈺成：非關紅燈

【明報專訊】有報道話立法會前主席曾鈺成參選特首遇中央「紅燈」，曾鈺成噚晚出席聖保羅書院165周年舊生晚宴，因為塞車遲到大半個鐘，唔通路上遇「紅燈」？曾鈺成到場後回應傳媒提問，笑住話唔係有無紅燈，只係無位泊車啫。問到讀書時期係咪成日遲到，佢就話「梗係唔係」。


呢場晚宴雲集政商界人物，金管局前總裁任志剛、前經濟發展及勞工局長葉澍堃，以及讀書時派政治傳單被拉坐監嘅民政事務局前局長曾德成等都有出席，各人準時到達，但未回應記者提問。多名娛圈校友現身表演。


晚宴主題係「保羅萬有」，象徵平等精神同學生多元化，更展出以5萬塊Lego砌成嘅聖保羅書院建築。校長源迪恩話，書院鼓勵學生多元發展，畀學生好大自由去學習同發展所長，所以孕育咗好多唔同才能嘅畢業生。