胡國興深水埗見街坊

【明報專訊】現任特首梁振英喺2012年參選特首，曾經用「一張櫈、一支筆、一本簿」爭取民心，落區到深水埗天台嘅居民大會聽取民意。新一屆特首選戰開鑼，率先宣布參選嘅退休法官胡國興噚晚都落區去深水埗，同一班基層街坊、團體接觸，不過胡官就無帶任何道具，只係到場後除咗件西裝褸，就開始同一眾街坊交流意見。


胡官噚晚7點到達深水埗一幢工業大廈，在場有40幾人向佢反映意見，唔少街坊同團體都好關注住屋問題，提到唔想再住劏房、租金愈來愈貴、希望快啲上到公屋等訴求，胡官主要都係聽居民意見，又收咗團體畀佢有關反對「小圈子」選舉、改善社福政策等請願信，原定約1小時嘅諮詢會，最後搞到晚上9點先結束。