立會兩「高人」同區讀中學 林卓廷陸頌雄籃球場舊相識

【明報專訊】立法會最近都好平和，流會、拉布呢啲劍拔弩張嘅畫面少咗好多。建制同泛民議員見面未必時時爭拗，間唔中都可以搵到共同話題。話說今屆立法會「高人」輩出，民建聯漁農界議員何俊賢「議會第一高」嘅名號，就畀民主黨林卓廷搶走咗。而工聯會陸頌雄就以6尺零半寸嘅身高，應該都係第三位。雖然林卓廷、陸頌雄政治立場南轅北轍，不過兩人都有共同嗜好，就係打籃球。


原來呢兩個高佬唔單止喺議事廳交手，好耐之前喺籃球場上都一樣交鋒過，因為佢哋係屯門區讀中學，各自代表校隊出戰，不時都有聯校比賽，二人都話，大家在相同時空，兩間學校校隊應該都會有比賽，估計曾經喺籃球場上較量過。林卓廷仲當住一眾記者面前，大讚「佢（陸頌雄）啲隊友好勁」，令佢印象深刻。


阿廷拒與周浩鼎陸頌雄踢波

不過隔籬嘅民建聯周浩鼎就抽水話，阿廷咁講即係話陸頌雄唔勁啦，搞到大家笑成一堆。其實立法會傳統一直都有足球隊，有唔同政治光譜嘅議員加入，促進一下議員之間感情。阿鼎同陸頌雄就叫阿廷不如都一齊踢波，但阿廷耍手擰頭，話真係唔識踢波，費事出醜！


其實，立法會議員家咁多高佬及後生仔女，立法會大可以搞返個籃球隊，相信有3個高佬助鎮，戰績都應該唔會差。